ཁྱེད་ཀྱི་འཁྲུངས་སྐར་ལ་རྟེན་འབྲེལ་ཞུ།

ཁྱོད་ཀྱི་འཁྲུངས་སྐར་ལ་རྟེན་འབྲེལ་ཞུ།

གཅན་འོད་འབར།

དུས་དེ་རིང།

མི་སེམས་གྲངས་མེད་ཀྱིས་བཏེགས་པའི་སྙིམ་པ།

ཁ་དོག་མི་འདྲ་བའི་དག་གཙང་ཁ་བཏགས་ཀྱིས་རྒྱན་ནས།

འབྱུང་བཞིའི་བར་ཆད་སྟོབས་ཀྱིས་གཤེགས་པའི་མེ་ཏོག་ཅིག

རྟ་ནོར་ལུག་གསུམ་གྱི་ལས་དབང་སྒོམ་ནས།

སྦྲ་ནག་དང་རྩྭ་ཐང་གི་སེམས་ཁོངས་ལ།

མཛེས་སྡུག་གིས་བཞད་པའི་ཉིན་མོ་ཡིན་ན།

ངས་ཁྱོད་ཀྱི་འཁྲུངས་སྐར་ལ་རྟེན་འབྲེལ་ཞུ།

དུས་དེ་རིང།

ལྷག་བསམ་དང་དད་འདུན་གྱིས་སྦྱར་བའི་ཐལ་མོ།

དབྱངས་རྟ་མི་གཅིག་པའི་སྨོན་ལམ་དང་གསོལ་འདེབས་ཀྱིས་བཀྱགས་ནས།

རི་ཆུ་སྟོང་ཕྲག་རྩལ་གྱིས་བརྒལ་བའི་ལྷ་བྱ་ཞིག

བྱ་ཁྱུའི་རང་དབང་གི་མདུན་ལྗོངས་བསམ་ནས།

ཡུལ་ནས་རྒྱང་དུ་འཕུར་བའི་གཏམ་རྒྱུད་ཡིན་ན།

ངས་ཁྱོད་ཀྱི་འཁྲུངས་སྐར་ལ་རྟེན་འབྲེལ་ཞུ་འོས།

རེ་བའི་མིག་ལ་བྱམས་བརྩེའི་འཛུམ་མདངས་གླན་ཞིང།

དད་པའི་སེམས་ལ་ཞི་བདེའི་དྲོད་ཐིགས་འཇོག་བཞིན།

ཕྱོགས་བཞི་མཚམས་བརྒྱད་ནས་བཞད་པའི་མེ་ཏོག

ཕྱོགས་བཞི་མཚམས་བརྒྱད་ལ་བབས་པའི་ལྷ་བྱ།

རང་ལ་དབང་བའི་རི་ཀླུང་དང་ཚང་མལ་མེད་ས་ནས།

དུས་བཞིའི་ཕྱིར་མིག་དང་དྲན་ཤིང་སུ་ལ་འཇོག་ཨང།

ལོ་ཟླའི་དྲན་གདུང་དང་སེམས་ངལ་གང་ལ་བཤད་ཨང།

ཞི་བདེའི་གཤོག་ཟུང་ལྡེམ་ལྡེམ།

སྙིང་རྗེའི་འདབ་མ་ལྷབ་ལྷུབ།

ཁེར་རྐྱང་དུ། ཁ་ཆར་བུ་ཡུག་གདོང་གིས་བསུས་ཤིང།

ཁེར་རྐྱང་དུ། བཙག་སེར་རླུང་འཚུབ་འཛུམ་གྱིས་བརྟོལ་ནས།

ངོ་གདོང་ལ་རྒས་གཉེར་བབས་པའི་ངང་ཚུལ་དང།

དབུ་སྐྲ་ལ་ཁ་བ་ཆགས་པའི་སྣང་བརྙན་དེ།

སུ་ཞིག་གིས་ཀྱང་མ་ཚོར་བའི་ཁྱོད་ཁོ་ནའི་ན་ཟུག་ཡིན་ངེས་ལ།

གང་ཞིག་གིས་ཀྱང་མ་རྟོགས་པའི་ཁྱོད་གཅིག་པོའི་ལས་དབང་ཡིད་སྲིད་ན།

དུས་དེ་རིང།

ཁྱོད་ཀྱི་འཁྲུངས་སྐར་ལ་ཅིས་ཀྱང་རྟེན་འབྲེལ་ཞུ་དགོས།

དཔྲལ་བའི་མིག་དང་འདྲ་བའི་མེ་ཏོག

ཁོག་པའི་སྙིང་དང་མཚུངས་བའི་ལྷ་བྱ།

འདབ་གཤོག་དབེན་པའི་ཕྱེ་ལེབ་ཚོས།

རྣ་བ་ཀྲོང་ཀྲོང་གིས་རྒྱང་རིང་ནས་ཁྱོད་ལ་ཉན་ཞིང་།

ཁ་ཕྱོགས་བྲལ་བའི་བྱེའུ་ཆུང་ཚོས།

མིག་ཟུང་ཀེམ་ཀེམ་གྱིས་ཐག་ཉེ་ནས་ཁྱོད་ལ་ལྟ་བ།

ཡིད་ཆེས་དང་དད་འདུན་གྱིས་དམ་ཚིག་བསྲུང་སྟངས་ཤིག་ཡིན་ནམ།

ལར་ཞེན་དང་རེ་སྨོན་གྱིས་རྨི་ལམ་རྨི་ཚུལ་ཞིག་ཡིན་ནམ།

གང་ལྟར་མུན་ཁྲོད་ནས་འོད་དུ་འཚེར་བའི་སྐར་ཆེན་ལྟར།

ནམ་ཡང་གཟི་བྱིན་བྲལ་བའི་གངས་རིའི་མཁའ་དབྱིངས་ལ་རྩེན་རོགས།

གང་ལྟར་བྱེ་ཐང་ན་ལྡེམ་མེར་འཁྱིལ་བའི་མཚོ་མོ་བཞིན།

གཏན་དུ་མེ་ཏོག་དབེན་པའི་སྤང་ལྗོངས་ཀྱི་ཉིན་སྲིབ་ལ་བཞད་རོགས།

༢༠༡༢།༧།༥ལ་བྲིས་པ་དགེའོ།