Wednesday, 24 June 2015

ངལ་གསོ་ཐེངས་གཅིག་གནང་རོགས།

ངལ་གསོ་ཐེངས་གཅིག་གནང་རོགས།

ཐག་རིང་ཐག་རིང་དུ་བསྡད་ནས།
བརྩེ་ཁུལ་གྱིས་ཁྱེད་རང་གླེང་མཁན་ཧ་ཅང་མང་ལ།
ཐག་ཉེ་ཐག་ཉེ་རུ་བཅར་ནས།
དུངས་མདོག་གིས་ཁྱེད་རང་འཆད་མཁན་ཡང་ཤིན་ཏུ་མོད།
འོན་ཀྱང་སུ་ཞིག་གིས་ཁྱེད་ཀྱི་གཉེར་མའི་འོག་གི་གཏམ་རྒྱུད་མ་མཐོང་ལ།
གང་ཞིག་གིས་ཀྱང་ཁྱེད་ཀྱི་འཛུམ་མདངས་ངོགས་ཀྱི་སྤྱན་ཆབ་མ་རིག
རྔུལ་ཆུར་བསྲེས་བའི་དཀའ་ཚེགས་ཀྱི་ལོ་ཟླ་རིང་མོ་དག
ཕྱོགས་བཞིར་ཞབས་ཀྱིས་བཅགས་པའི་བཤུལ་དུ་འཐིམ་ཞིང།
ན་ཟུག་ཟབ་པའི་ངལ་དུབ་ཀྱི་ཉིན་མཚན་གྲངས་མེད་དག
འགྲོ་དྲུག་བྱམས་ཀྱིས་བསྐྱངས་བའི་མཛད་རྗེས་ཁྲོད་འདའ་བཞིན་པར་བསམ་ན།
ད་ནི་ཁྱེད་རང་ལྷོད་ཀྱིས་ངལ་གསོ་ཐེངས་གཅིག་བྱེད་རན་འདུག་ཨང།
བདག་གི་སློབ་དཔོན་ལགས།
ངལ་གསོ་ཐེངས་གཅིག་གནང་རོགས།

ཁྱེད་ཀྱི་འཁྲུངས་སྐར་ལ་རྟེན་འབྲེལ་ཞུ།


ཁྱོད་ཀྱི་འཁྲུངས་སྐར་ལ་རྟེན་འབྲེལ་ཞུ།
གཅན་འོད་འབར།
དུས་དེ་རིང།
མི་སེམས་གྲངས་མེད་ཀྱིས་བཏེགས་པའི་སྙིམ་པ།
ཁ་དོག་མི་འདྲ་བའི་དག་གཙང་ཁ་བཏགས་ཀྱིས་རྒྱན་ནས།
འབྱུང་བཞིའི་བར་ཆད་སྟོབས་ཀྱིས་གཤེགས་པའི་མེ་ཏོག་ཅིག
རྟ་ནོར་ལུག་གསུམ་གྱི་ལས་དབང་སྒོམ་ནས།
སྦྲ་ནག་དང་རྩྭ་ཐང་གི་སེམས་ཁོངས་ལ།
མཛེས་སྡུག་གིས་བཞད་པའི་ཉིན་མོ་ཡིན་ན།
ངས་ཁྱོད་ཀྱི་འཁྲུངས་སྐར་ལ་རྟེན་འབྲེལ་ཞུ།

Tuesday, 14 April 2015

སྐྱེས་སྐར།


                                                                                                      གཅན་འོད་འབར།
རྒས་ཀྱིན་པའི་གནའ་བོའི་རོལ་དབྱངས་འདིའི་གཏིང་ནས།
དཔྱིད་གཞུང་ཞིག་ལ་འཁེལ་བའི་སྐྱེས་སྐར་དེ་དྲན་བྱུང།
མེ་ཏོག་རྐྱང་རྐྱང་གི་དུས་ཚིགས་ཤིག་གམ།
ཉི་འོད་ཏག་ཏག་གི་ལོ་ཟླ་ཞིག་སྟེ།
མི་ཚེའི་དྲན་ཤིང་དུ་ལྷག་པའི་ཉིན་མོ་ཞིག
འཚོ་བའི་མིག་གོང་དུ་བཏབ་པའི་ཉིན་མོ་ཞིག
དཔྱིད་ཀ་སླེབས་ཐེངས་རེ་དང་མེ་ཏོག་བཞད་དུས་རེར་ཚེས་ཤིང་།
ཆར་བ་འབབ་དུས་རེ་དང་བསིལ་རླུང་ལྡིང་ཐེངས་རེར་ཤར་བ་དེ་ཡིན།

Thursday, 1 January 2015

ང་ཚོས་རང་ཉིད་ལ་སྦྱིན་ཆོག་པའི་ངོ་མཚར་ཅན་གྱི་ལེགས་སྐྱེས།

                                ང་ཚོས་རང་ཉིད་ལ་སྦྱིན་ཆོག་པའི་ངོ་མཚར་ཅན་གྱི་ལེགས་སྐྱེས།
                                                                                                ཀི་ཤོར་ཨསི་ཐཱ་ན་ལགས་ཀྱིས་བརྩམས།
                                                                                                གཅན་འོད་འབར་གྱིས་བསྒྱུར།


    ཡེ་ཤུའི་འཁྲུངས་སྐར་དུས་སྟོན་དང་ལོ་སར་གྱི་དུས་ཚིགས་བཅས་སུ་ང་ཚོས་རང་ཉིད་ཀྱི་བསམ་བློ་དང་ཆུ་ཚོད་མང་པོ་ཞིག་གཞན་ལ་ལེགས་སྐྱེས་ཅི་ཞིག་སྤྲོད་དགོས་པའི་ཐད་གཏོང་གིན་ཡོད་ལ། ཡང་ང་ཚོ་འགའ་ཤས་ཀྱིས་ཆུ་ཚོད་གང་མང་སྤྱད་དེ་སོ་སོར་ལེགས་སྐྱེས་གང་ཞིག་སྟེར་དགོས་པའི་ཐད་བསམ་བློ་གཏོང་གིན་ཡོད། འདི་ལྟར་སྒྲུབ་མཁན་གྱི་མི་དག་གིས་ “དངོས་པོ་” ཁོ་ན་ཉོ་སྒྲུབ་ཙམ་ལས་གཞན་ཕྱོགས་གང་ལའང་བསམ་གཞིགས་བྱེད་ཀྱི་མེད། འོན་ཀྱང་ཁྱོད་ཀྱིས་རང་ཉིད་ལ་ཉོ་སྒྲུབ་བྱེད་ཐུབ་པའི་དངོས་བོ་དག་ལས་ཀྱང་རྩ་ཆེ་བའི་ལེགས་སྐྱེས་མང་པོ་ཞིག་སྟེར་ཐུབ་པ་ཤེས་ཀྱི་ཡོད་དམ།

Tuesday, 23 December 2014

ཨ་འགྲིག་ཆ་འགྲིག

ཨ་འགྲིག་ཆ་འགྲིག (གཞས་ཚིག)

ཉི་ཟླ་ཨ་འགྲིག་ཆ་འགྲིག།།
སྐར་ཆེན་སྐར་ཆུང་ཡང་འགྲིག།།
དགུང་ལ་འགྲིག་རྒྱུ་བྱུང་ན།།
དྲོ་འཇམ་འོད་སྣང་སེར་པོ།།
གླིང་བཞིའི་རྒྱན་དུ་ཤར་ཆོག།།

ཕ་མ་ཨ་འགྲིག་ཆ་འགྲིག།།
བུ་ཆུང་བུ་མོ་ཡང་འགྲིག།།
ཁྱིམ་ལ་འགྲིག་རྒྱུ་བྱུང་ན།།
ལྷན་འཛོམས་དུས་ཀྱི་དགའ་སྟོན།།
ཡང་ནས་ཡང་དུ་རོལ་ཆོག།།

གང་ན་ཡོད།

               གང་ན་ཡོད།
                                                     གཅན་འོད་འབར།
 རྒྱང་རིང་ནས་འཕུར་འོང་བའི་བྱ་ཁྱུ།
རླུང་བུས་གཏོར་བའི་ཚང་མལ་དེའི་མཐར་རུབ་ནས།
ལོ་ཟླའི་རེ་སྒུག་གིས་བསེད་བའི་འདབ་གཤོག་ལྡེམ་ལྡེམ།
རི་ཀླུང་གཞན་ཞིག་གི་ཁ་ཕྱོགས་སྙེག་དུས།
ནམ་རྒྱུན་ཐག་རིང་ལ་བཞུད་འགྲོ་བའི་གནའ་བོའི་གཙང་བོ་དེ་ཡང།
དུས་ཀྱིས་འཁྱག་པས་བསྡམས་ནས་ལོ་མང་འགོར་བ།
ཉེ་འགྲམ་ན་ཀེ་རེར་འགྲེང་བའི་ཤིང་སྡོང་དང་རི་ཚོགས་ཀྱི་ཆིག་ལབ་ལས་གོ་བྱུང།
འབབ་སའི་གནས་རི་མེད་པའི་བྱ་ཁྱུ།
བཞུད་སའི་གྲོག་རོང་དབེན་པའི་གཙང་བོ།
ཁ་མ་གྲགས་པར་ཡུན་རིང་འགོར་བའི་དེ་རིང།
དེ་རིང་ཡང་སྙིང་གང་ན་ཡོད།
གང་ན་ཡོད།

Thursday, 4 December 2014

སེམས་འགྱུ་རབ་རིབ།

སེམས་འགྱུ་རབ་རིབ།

ནམ་རྒྱུན་ཞོགས་པའི་ཉི་ཟེར་འབབ་པའི་ཕྱོགས་ལ་འཁོར་ནས་ཁེར་རྐྱང་གི་ཚོར་སྣང་དག་རླུང་ལ་བསྐུར་རྒྱུ་ནི་སུ་ཞིག་དྲན་པའི་ཉིན་མཚན་དག་གི་སྐྱོ་བའི་དྲན་གདུང་རིང་མོ་ཉིན་ཐོར་འགོད་པ་དང་མཚུངས་བས། ཉི་ཟེར་ལ་ལྟ་བ་ནི་རང་གིས་རང་ལ་སེམས་གསོ་བྱེད་པ་དང་ཡང་འདྲ། སུ་ཞིག་ལ་ཡང་བརྩེ་བའི་རེ་བ་མ་བཅངས་བར་ཡུན་རིང་ཞིག་འདས་རྗེས་ཀྱི་དེ་རིང་། ཆར་བ་དང་ན་བུན་འཐབས་པའི་ཁྲོད་ནས་མེ་ཏོག་ཅིག་བདག་གི་མིག་གོང་ལ་སྐྱེས་ཤིང་སེམས་ཁོངས་ལ་བཞད་པའི་གཏམ་རྒྱུད་ཅིག་གི་དབུ་ཁྱུད་རང་བྱུང་གིས་བྲིས་པ་འདི་བདེ་སྐྱིད་ཅིག་གི་སྔོན་འགྲོ་ཡིན་ན་སྡུག་བསྔལ་ཞིག་གི་ས་བོན་ཡིན་པ་ངས་ཀྱང་གསལ་པོ་ཞིག་མ་རྟོགས་མོད། རང་སེམས་རང་ལ་མི་དབང་པའི་ཁྱད་མཚར་གྱི་ངང་ཚུལ་འདི་བསམ་ན་ང་ལ་ཡང་གདམ་ག་གཞན་ཞིག་མི་འདུག